26/06/2010
Política Lingüística promove a galeguización da telefonía móbil
Promover o uso do galego no ámbito das novas tecnoloxías e, máis concretamente, na telefonía móbil constitúe o obxectivo fundamental do proxecto O teu móbil en galego, que a Secretaría Xeral de Política Lingüística puxo en marcha en colaboración con Ineo, a asociación de referencia en Galicia para o sector das tecnoloxías da información e da comunicación. A iniciativa inclúe diversas medidas encamiñadas a impulsar e facilitar a comunicación en lingua galega. Por unha banda, asináronse convenios de colaboración cos principais fabricantes e operadores de telefonía móbil. Paralelamente, creouse a web www.oteumobilengalego.com, que pretende converterse na páxina de referencia para calquera busca vinculada aos teléfonos móbiles e ao galego.
Os convenios de colaboración impulsados por Política Lingüística foron asinados por cinco compañías operadoras –Orange, R, Telefónica Móviles, Vodafone e Yoigo– e cinco empresas fabricantes –Alcatel, Motorola, Nokia, Samsung e Sony Ericsson–. Este acordo fará posible a implantación progresiva do galego como opción idiomática nos menús e noutras aplicacións dos terminais móbiles que se comercialicen en Galicia, así como nos manuais de usuario e nas guías rápidas en soporte electrónico que se poidan descargar desde a web.
Substitución de terminais
As empresas operadoras comprométense, a través deste convenio, a facilitar que calquera comunicación oral ou escrita cos seus clientes se poida realizar en galego e a promover campañas para que os seus usuarios coñezan a existencia de terminais na lingua propia de Galicia.