Desde a Secretaría Xeral de Política Lingüística da Xunta de Galicia asinamos un convenio cos principais fabricantes e operadores de telefonía móbil que prestan servizos en Galicia como parte dunha importante tarefa que estamos a levar a cabo para a promoción do uso do galego no sector das novas tecnoloxías.
Con este motivo, creamos este espazo no que os usuarios e as usuarias poidan acceder a todos os recursos dispoñibles na nosa lingua para os seus terminais de telefonía e a toda a información sobre as compañías que lles ofrecen aos seus clientes produtos ou servizos en galego.
O acordo coas empresas do sector permítenos, ademais de impulsar a comunicación na nosa lingua, poñer de relevo as vantaxes do plurilingüismo como un valor engadido de mercado no sector das novas tecnoloxías.
Esta web constitúe o principal elemento dunha campaña que fará posible que o teu móbil fale o mesmo idioma ca ti e, a través dela, podes coñecer os terminais que hai actualmente no mercado coa opción do galego e mediante que operadoras conseguilos. Tes ademais a posibilidade de actualizar o teu móbil a través das descargas dispoñibles en "Galeguiza o teu móbil".
Benvid@s e grazas por visitarnos.
Marisol López Martínez
Secretaria Xeral de Política Lingüística